“Müasir xarici siyasətin fəlsəfəsi və xalq diplomatiyası” mövzusunda Dəyirmi Masa keçirildi

Bu gün AMEA-nın Fəlsəfə və Sosiologiya İnstitutunda “Müasir xarici siyasətin fəlsəfəsi və xalq diplomatiyası” mövzusunda Dəyirmi Masa keçirildi.
AMEA Fəlsəfə və Sosiologiya İnstitutunun baş direktoru, f.e.d., professor İlham Məmmədzadə mövzu ilə bağlı çıxış edərək qeyd etdi ki, Azərbaycan Prezidentinin həyata keçirdiyi effektiv xarici siyasətin əsası ulu öndər Heydər Əliyev tərəfindən qoyulmuş balanslaşdırılmış siyasi kursun varisliyini təmin etməklə yanaşı, müasir dünyanın çətin geosiyasi gerçəkliklərində xalq diplomatiyası xarici siyasətin ayrılmaz tərkib hissələrindən biri olmuşdur. Rəsmi Bakı bu illərdə də beynəlxalq hüquq prinsiplərindən çıxış edərək praqmatizmə, qarşılıqlı faydalı əməkdaşlığa əsaslanan açıq xarici siyasət yeritmiş, qlobal geosiyasi məkanda cərəyan edən proseslərə çevik və adekvat reaksiya, ikitərəfli və çoxtərəfli əməkdaşlığa üstünlük vermişdir.

İlham Məmmədzadə çıxışına davam edərək Azərbaycan-Ukrayna elmi və diplomatik əlaqələrinin inkişaf etdirilməsində əməyi olan, uzun illərə Ukrayna Milli Aviasiya Universitetinin (MAU) Beynəlxalq Münasibətlər İnstitutunun Beynəlxalq hüquq kafedrasının professor vəzifəsində çalışmış, “Ukrayna Azərbaycanlıları Alimlər Şurası” ictimai təşkilatının sədri Arif Quliyevin gördüyü işləri qeyd edərək, onu 70 illik yubileyi münasibəti ilə təbrik edib, alimə elmi yaradıcılığında uğurlar arzuladı.

Fəlsəfə və Sosiologiya İnstitunun icraçı direktoru, tarix elmləri doktoru Eynulla Mədətli hüquq elmləri doktoru professor Arif Quliyevin Ukraynadakı elmi-ictimai fəaliyyəti haqqında dəyirmi masa iştitrakçılarına ətraflı məlumat verərək, Azərbaycan diasporasının Ukraynadakı uğurlu fəaliyyətindən söz açdı. Azərbaycan-Ukrayna əlaqələrindən bəhs edən E.Mədətli dövlətlərarası humanitar əlaqələrin uğurla davam etdirildiyini bildirdi. Məhz bu əlaqələrin nəticəsi olaraq

Azərbaycanın Ukraynaya mütəmadi humanitar yardımlar göstərməsini misal gətirdi və bu əlaqələrin vüsət tapmasında elmə, xalqa təmənnasız xidmət göstərən Arif Quliyev kimi ziyalılarımızın böyük xidmətlərinin olduğunu bildirdi.
Azərbaycan Respublikasının Ukraynada fövqəladə və səlahiyyətli səfiri Elmira Axundova çıxışı zamanı Arif Quliyevi yubileyi münasibəti ilə təbrik etdi, ona elmi və ictimai işlərində müvəffəqiyyətlər dilədi.
AMEA Azad Həmkarlar Komitəsinin sədri, hüquq elmləri doktoru, professor Habil Qurbanov “Xalq diplomatiyası” kitabının müəllifi, Ukrayna Azərbaycanlıları Alimlər Şurasının Sədri Arif Quliyevi yubileyi münasibəti ilə təbrik edərək, alimi 70 illiyi ilə əlaqədar Fəxri Fərmanla təltif etdi.

Fəlsəfə və Sosiologiya İnstitutunun “Müasir siyasətin fəlsəfəsi” şöbəsinin müdiri, f.e.d., professor, Rəna Mirzəzadə, f.e.d., Füzuli Qurbanov, f.e.d., professor Sakit Hüseynov, “Azərbaycanım” jurnalının baş redaktoru Emil Nəsirli (Arif Quliyevi “Azərbaycanın qüruru” Qızıl Ordeni ilə təltif etdi), t.e.d. Qasım Hacıyev, Vətən müharibəsi qazisi, Suraxanı rayon İcra Hakimiyyətinin şöbə müdiri Elmar Hüseyn, Bərdə rayon Veteranlar Təşkilatının sədri, Qarabağ qazisi Gəray Əsədov, itqisad elmləri doktoru, professor Rasim Həsənov və digər çıxış edənlər Arif Quliyevin Ukrayndakı elmi və ictmai fəaliyyəti haqında öz fikirlərini dəyirmi masa iştirakçıları ilə bölüşüb və alimi yubileyi münasibəti ilə təbrik ediblər.
Hüquq elmləri doktoru, professor, Ukraynanın əməkdar təhsil işçisi Arif Quliyev “Müasir xarici siyasətin fəlsəfəsi və xalq diplomatiyası” mövzusunda fikirlərini dəyirmi masa iştirakçıları ilə bölüşərək, ona göstərilən diqqətə və elmi-ictimai fəaliyyətinin yüksək qiymətləndirilməsinə görə Fəlsəfə və Sosiologiya İnstitunun rəhbərliyinə, tədbirə gələn və çıxış edən hər kəsə minnətdarlığını bildirdi.